Pormal a binukatan idi kalman, Marso 10, 2026, ti Strawberry Festival Trade Fair idiay km5 Parking Area kas paset ti pannakarambak ti bantog a Strawberry Festival ti ili. Nangrugi ti programa iti panagbasbas (blessing), sinarunuan ti pannakatanghal dagiti artists a da Selena ken Elixer, ken ti ribbon cutting a indauluan da La Trinidad Mayor Roderick Awingan, Vice Mayor Guiller Galwan, Councilor Belmer Elis ken dadduma pay nga opisyal ti lokal a gobyerno.
Iti saad dagiti mensahe, inyawat dagiti opisyal ti panagyaman kadagiti organizers ken amin a simmangpet iti pananglukat ti trade fair, nga inbilang da a maysa kadagiti kangrunaan a paset ti entero a selebrasion ti Strawberry Festival iti probinsya.
Sigun kenni Councilor Belmer Elis, napateg unay ti trade fair iti pannakarambak ti festival agsipud ta ditoy naggapu ti dakkel a paset ti pondo a maus-usar para kadagiti nadumaduma nga aktibidad ken premyo iti entero a selebrasion. “Without the trade fair, no Strawberry Festival would happen,” kuna ni Councilor Elis.
Inlawlawag payna a dumanon iti agarup Php6 milyon ti nalikom a pondo manipud iti trade fair, nga agbalin a suporta iti panangipatungpal kadagiti aktibidad ken pannakaited kadagiti premyo iti festival.
Namnamaen met dagiti opisyal a saan laeng a mangted rag-o ken naraniag a kapadasan kadagiti bisita ti trade fair, no di ket tumulong met iti panangpabileg ti lokal nga ekonomiya ti La Trinidad babaen iti panangsuporta kadagiti lokal a negosyante ken produkto.
Source: DZWT 540 AM – News & Information
