Naikkan iti arrival honors ti baro a naipromotar a hepe ti Philippine National Police (PNP) a ni PGen Jose Melencio C. Nartatez Jr. idi Miyerkules, Enero 28,2026, kalpasan ti panagsublina idiay PNP headquarters idiay Camp BGen Rafael T Crame, Quezon City. Nakadanon isuna iti opisina sakbay nga ag alas dose ken sinabat isuna ni PLtGen. Bernard Banac, Deputy Chief PNP for Administration.
Kalpasan ti honors, nakisarita ni CPNP Nartatez kadagiti personnel ti PNP kas tawag a “Talk to Men”. Kinunana a kas mangidadaulo ti PNP ket ammo na a daytoy a responsibilidad ket nakasalalay iti disiplina, propesionalismo, ken sakripisyo dagiti amin a pulis, adda man iti frontline wenno iti behind the scenes.
Innayon ni PGen Nartatez a awatenna daytoy a trabaho nga buyogen ti natibker a panggep. Kas PNP Chief, panguloenna ti organisasion a sipapasnek a sumurot iti Konstitusyon ken ipatungpal ti linteg nga awan ti panangpili. Kinunana pay a ti disiplina, propesionalismo, ken kinapudno ket saan a pagpilian, no di ket masapul a masurot.
“I accept this responsibility with resolve and a clear sense of purpose… As Chief, I will lead this organization in faithful service to the Constitution. I will enforce the rule of law without fear or favor. Professionalism, discipline and integrity are not optional, they are expected,” kinuna ni PGen Nartatez.
Naimbag a damag pay a pinaneknekan ti Malacañang nga impromotar ni Presidente Ferdinand “Bongbong” Marcos Jr. ni PGen Nartatez a kas full-fledged a PNP Chief ken impaayna ti ranggo a four-star police general. Daytoy ket kalpasan ti adu a bulan a panagserbina a kas acting chief.
Naawat ni Nartatez ti posisyon a acting PNP chief idi Aug. 26 kalpasan ti panagikkat ti dating hepe a ni PGen Nicolas Torre III. Saan isuna a napromotar idi gapu ta saan pay a nagretiro ni Torre. Kalpasan a naipaayan ni Torre iti optional retirement ken nagbalin a MMDA general manager, napalubosan met laeng a mapromotar ni PGen Nartatez, nasurok lima a bulan kalpasan ti panagkabilna a kas acting PNP chief.
