Matunog ang Pansit Batil Potun na dinarayo at kinatatakaman ng karamihan kapag dumarayo sa lungsod ng Tuguegarao, Cagayan.
Bilang bahagi ng Pavvurulun Afi Festival, nagkaroon ng patimpalak sa pasarapan sa pagluto ng dinarayong delicacy ng lungsod.
Nasungkit ng Mariane’s Panciteria ang kampeonato sa katatapos na Pattaradday PANSIT BATIL POTUN FEST 2023 – Pancit Cooking Contest na ginanap sa Calle Comercio/Bonifacio Street nito lamang Sabado, Agosto 12, 2023.
Nakatanggap ng cash prize na Php50,000 at trophy ang Mariane’s Pansiteria, samantalang pumangalawa naman ang Julies Pansiteria na nakatanggap ng cash prize na Php30,000 at pumangatlo ang Jomar’s Pansiteria na nakatanggap ng Php20,000.
Nakuha rin ng Jomar’s Panciteria ang special prize para Most Shared and Liked na may premyong Php5,000 at Best Pansit Presentation, kung saan nakatabla nila ang Bancho’s Panciteria at may cash prize na Php5,000.
Dahil dito, personal na dinagdagan ni dating 3rd District Congressman Randy Ting na naroon din sa nasabing kaganapan ng Php5,000 para sa Best Pansit Presentation.
Kasabay nito, nakamit naman ng JM Alan’s Pansiteria ang Best in Cleanliness na may kaakibat na premyong Php5,000.
Nasa 16 na mga pansiteria ang nakilahok ngayong taon sa nasabing kompetistyon, kung saan ang mga di pinalad ay nakatanggap ng tig Php5,000 bilang consolation prize.
Samantala, nakatanggap naman ng Php15,000 plus trophy ang mga kalahok mula sa Barangay San Gabriel matapos manalo sa pabilisan ng pagkain ng pansit sa Pansit Eating Contest kasabay ng Pansit Batil Potun Fest.
Ang nabanggit na festival ay dinaluhan ng mga miyembro ng City Government of Tuguegarao sa pangunguna ni City Mayor Maila Rosario Ting-Que.
Source: Tuguegarao City Information Office
