Nagsangpet dagiti negosyante ken lider iti negosyo manipud Hawaii ken Pilipinas iti Hawai’i–Philippines Biz Connect Forum nga naangay idiay Aureo Hotel and Resort iti San Fernando City, La Union kas paset ti 33rd Annual Hawaii Trade Mission to the Philippines.
Iti forum, naiparang-ay dagiti talento ken ideya dagiti lokal nga entrepreneurs babaen ti panagpresenta dagiti innem a negosyante kadagiti produkto ken serbisyo da iti sangoanan dagiti eksperto iti negosyo, investors, ken posible a partners.
Dagiti naiparang nga produkto ket naglaon iti bamboo goods, lokal a snacks, woven clothing, web services, tailored fashion, ken hand-painted accessories.
Iti tunggal presentasyon, inlawlawag dagiti negosyante ti konsepto ti negosyo da ken dagiti plano da para iti pannakaitaray ken pannakaitalged ti negosyo iti mas dakdakkel a merkado. Dagiti business experts ket nagdamag maipanggep iti market potential, demand, ken estratehiya para iti panagdakkel ti negosyo.
Ti Hawai’i–Philippines Biz Connect Forum ket mangipakita iti napigsa a panagkaykaysa iti ekonomia ti Hawaii ken Pilipinas, ken mangted iti gundaway kadagiti small and medium enterprises tapno mapalawa ti merkado da agingga iti international a lebel.
Kinuna dagiti organizers a ti forum ket maysa a plataporma para iti panagbinuligay, panagparang-ay ti inobasyon, ken pannakabukel dagiti baro a partnership kadagiti negosyante manipud Hawaii ken Pilipinas.
Babaen iti panagikonek kadagiti entrepreneurs kadagiti investors ken industry leaders, ti forum ket mangsuporta iti pannakaparang-ay dagiti negosyo a mabalin nga agkompetensya iti global a merkado.
Source: PIA Ilocos Region
