Nadiskubre ti maysa a naidumduma a mula a Rafflesia lagascae, a mas kilala kas “corpse flower,” idiay Barangay Eva, Calanasan, Apayao. Daytoy a natakuatan ket mangipakita ti kinapateg ken kinadakkel ti biodiversidad iti probinsia, nga isu met ti mangpalagip iti kinapateg ti panangsalaknib iti kinabaknang ti kalikasan.
Sigun iti Municipal Environment and Natural Resources Office (MENRO) ti Calanasan, immuna a namataan dagiti Green Guards ti nasao a halaman bayat ti panangaramidda iti validation operation iti kabakiran. Kalpasan ti panangberipikar, nadiskubre da nga adda adu a Rafflesia a namumukel iti lugar a nangato iti nasurok 600 metro iti lebel ti baybay.
Ti Rafflesia lagascae ket maysa a endemic a mula iti isla ti Luzon. Mailasin daytoy gapu iti dakkel ken naisangsangayan a langa na ken ti naespesial a banglo na, a kadawyan a maiparit iti banglo ti natay a bagi, isu a nakaited iti nagan a “corpse flower.”
Nairekord ti panakadiskubre iti kaaldaw ti World Wildlife Day idi Marso 3, 2026, a mangipakita iti simbolo ti panangyeg ti atensyon iti publiko maipanggep iti kinapateg ti panangsalaknib ken panangaywan iti kalikasan ken dagiti bihir a specie a masarakan laeng iti pagilian.
Dagiti otoridad ket agaw-awag iti publiko a makipagtinnulong iti panangsalaknib kadagiti kabakiran tapno mapagtalinaed ti kinabaknang ti flora ken fauna iti lugar.
Source: DZWT 540 AM News & Information
