Isang magsasaka na may tama ng bala sa kaliwang bahagi ng ulo ang natagpuan sa Sitio Dardaraoas, Barangay Pagala, Bucay, Abra nito lamang ika-1 ng Nobyembre 2023.
Kinilala ang biktima na si Rolly Alcaide Lumaoig, lalaki, 68 anyos, may asawa, magsasaka at residente ng naturang lugar.
Nabatid na isang concerned citizen ang tumawag sa Bucay Municipal Police Station, na may isang lalaking nakahandusay sa nasabing lugar at agad naman itong nirespondehan ng Bucay PNP at Abra 2nd Provincial Mobile Force Company.
Ayon sa ulat, natagpuan ang isang Rusi scooter motorcycle na nakatumba sa gilid ng kalsada habang sa tabi naman nakahandusay ang isang lalaki na walang nang buhay at walang damit pang-itaas.
Patuloy ang malalim na imbestigasyon ng Bucay PNP upang matukoy ang dahilan sa pagpaslang sa biktima at mapanagot ang nasa likod nito.
