Pormal a rinugyan idi Marso 4, 2026 ti panagipatakder iti libre a pabahay para iti pamilya ti maysa a nagbalik-loob idiay ili ti Gattaran, Cagayan, babaen iti inisyatiba ti 2nd Cagayan Provincial Mobile Force Company (PMFC). Daytoy a proyekto ket paset ti panangipatungpal iti Revitalized Project TULAY AKO (TUbig ken iLaw Alay iti mamamayan ken Ayudang Kabuhayan Ora mismo) a mangipakita iti suporta ti gobyerno kadagiti nagdesisyon a agsubli iti linteg ken mapia a biag.
Nalagip a idi Pebrero 28, 2026, personal a nagited dagiti pulis ti 2nd CPMFC iti umuna a materyales ken kagamitan a kasapulan iti panagbangon ti balay. Daytoy ket resulta ti naipatungpal a panagsukimat ken koordinasyon kadagiti opisyales ti Local Government Unit (LGU), barangay officials, ken ti 2nd CPMFC Company Advisory Group tapno masigurado a maipatungpal iti nasayaat ti proyekto.
Iti panangrugi ti konstruksion, nagkaykaysa dagiti pulis ti 2nd Maneuver Platoon ken 2nd CPMFC, kadua dagiti barangay officials ken tanod, a nagtulong-tulong tapno mapapintas ken mapaspas ti panagbangon ti pagtaengan. Daytoy a panagtinnulong ket mangiparangarang iti bayanihan ken ti kinapudno a panangikankano ti gobyerno ken komunidad kadagiti nagbalik-loob.
Nakaibatay daytoy a inisyatiba iti adal ken panggep ti National Task Force to End Local Communist Armed Conflict (NTF-ELCAC) a mangitulod iti whole-of-nation approach. Babaen iti daytoy, maited dagiti komprehensibo a suporta iti reintegration tapno matulongan dagiti nagbalik-loob ken pamilia da a makapagsubli iti normal ken natalged a panagbiag.
Segun kenni PMaj Jefferson D. Mukay, Acting Force Commander ti 2nd CPMFC, agtultuloy ti panangipateg ti kapulisan iti panangsuporta kadagiti nagbalik-loob tapno mapagtalinaed ti kapia ken kaunlaran iti komunidad. Inyapela met ti kapulisan kadagiti adda pay laeng iti awan a husto a dalan a usaren dagiti programa ti gobyerno a mangted gundaway iti baro a panagbiag ken nasaysayaat a masakbayan.
Source: 2nd Cagayan PMFC
