Itinanghal bilang bagong World Boxing Council o WBC Asia Featherweight Champion si KJ Natuplag matapos niyang talunin ang kanyang kalaban sa pamamagitan ng knockout sa main event ng Vic Boxing Promotions na ginanap sa Dubai, UAE nito lamang Sabado, Hunyo 25, 2022.
Nanalo si Natuplag sa ikalawang round matapos ipahinto ng referee ang laban dahil hindi na makatayo ang kanyang kalaban na si Attanon Kunlawong, isang Thai Boxer.
Ayon kay Natuplag, hindi niya inaasahang matatalo niya ang kanyang kalaban sa pamamagitan ng KO dahil sa unang round pa lang ay nahirapan na siya kay Kunlawong.
Ayon pa kay Natuplag, sumailalim siya sa dalawang buwan na pagsasanay na nakasentro sa training upang mapalakas ang kanyang stamina, endurance at iba pang boxing combination.
Dagdag pa niya, nakahanda siya sa anumang plano ng kanyang promoter kung kailan ang kanyang unang laban upang depensahan ang kanyang titulo.
Labis naman ang pasasalamat ni Natuplag sa lahat ng tumulong sa kanya lalo na sa kanyang pagsasanay.
Si Natuplag ay 25 anyos na tubong Ifugao at mula sa Highland Boxing Gym na may 10 panalo kung saan walo dito ay sa pamamagitan ng knockout at 3 naman na talo.
