Isagsaganan ti provincial government ti Nueva Vizcaya ti pannakaited ti tulong pinansyal para kadagiti tricycle driver iti probinsiya kas sungbat iti napartak a panagngato ti presyo ti petrolyo. Segun ken Gov. Jose Gambito, aggapu met laeng iti budget ti probinsiya ti pondo a mangsuporta iti daytoy a programa tapno makatulong kadagiti drayber a nakadepende iti gasolina para iti pagbiaganda.
Maipatungpal manen ti Project JING (Jobs in Need of Gifts) a mangited iti fuel vouchers kadagiti miyembro ti Tricycle Operators and Drivers Association (TODA). Dagiti voucher ket mabalin a mausar dagiti drayber iti pannakargar iti gasolina, a makatulong iti panangbaba iti gastusda iti inaldaw a panagbiyahe.
Sigun iti probinsya, iti napalabas ket agarup 6,000 a TODA members ti nakalista a makaawat iti daytoy a tulong. Nupay kasta, gapu iti agtultuloy a panagngato ti presyo ti petrolyo, pagadalanda pay dagiti posible a panagbalbaliw wenno adjustments iti programa, a mabalin pay nga agkasapulan iti panangnayon ti pondo tapno maisali amin a kwalipikado a drayber.
Kabayatanna, nangipaay met ti provincial government iti panangayab iti publiko a mangipakat iti panagtitipid iti panagusar ti petrolyo babaen iti panangusar kadagiti alternatibo a transportasyon kas iti e-bike, bisikleta, wenno panagpagna.
Nabuo met ti maysa a task force a pakairamanan ti PNP, DILG, PROCEDE ken DTI tapno bantayan ti presyo ti produktong petrolyo ken maaksiyonan dagiti posibleng panaglabsing, a maipatumpal babaen iti executive order nga ipalubos ni Gov. Gambito.
“Since this is emegency in nature, I will issue and Executiver Order, formin the adhoc committee who will monitor and report the data and will report it to proper authority para yung mga may violation ay pwedeng mafilan ng case o maireport sa mga mayor nila para hindi bigyan ng business permit,” kinuna ni Gov. Gambito.
Source: DWRV1233.Official
