Dua a naiduma a aksidente iti kalsada ti napasamak idiay Quezon, Nueva Vizcaya iti naglabas a lawas a nangiturong iti ipapatay dagiti dua a biktima, kas naipakaammo iti inisyal a report dagiti pulis.
Natay ti maysa nga engineer nga empleyado ti Department of Science and Technology kalpasan a bimmaliktad ti minanehona a sports utility vehicle (SUV) a kukua ti ahensiya idiay lugar ti Baresbes idi Huwebes, Marso 12, 2026, iti aglawlaw ti alas singko iti malem.
Segun iti report ti Quezon PNP, pababa ti lugan iti kurbada a paset ti kalsada idi naawan ti kontrol ti driver, a nangiturong iti panagbaliktad ti SUV iti sikigan ti dalan.
Nagtamo ti nadagsen a sugat ti driver ken ti maysa pay a kaduana iti aksidente. Dagiti dua ket napardas a naiyakar iti pagagasan, ngem naideklara a dead-on-arrival ti driver, kabayatan a matultuloy ti panakaagas ti kaduana.
Iti sabali a pasamak idi Lunes iti rabii, Marso 10, natay met ti maysa a babai kalpasan a natnag iti sikigan ti dalan ti tricycle a sinakayana idiay Barangay Runruno iti isu met laeng a munisipyo. Maibatay iti imbestigasion, aggapu koma dagiti biktima iti maysa nga okasion idiay Barangay Calaocan ken agaw-awidda idi napasamak ti aksidente.
Nupay kasta, idi adda dan iti agpangato ken pakurbada a paset ti kalsada, saan a nalabit a napansin ti driver ti nagaraw a paset ti dalan a naaddaan laeng iti plastic barrier. Daytoy ti nangiturong iti pannakatnag ti tricycle iti ilang a metro a kauneg ti sikigan ti dalan.
Dagiti dua a biktima ket nagtamo ti grabe a sugat ken naiyakar iti ospital, ngem naproklamar a natay ti babai. Patuloy a maus-usisa dagiti otoridad ti napasamak a dua a aksidente.
Source: DWRV1233.Official
