Pinanamnama ti Department of Trade and Industry (DTI) Region 1 kadagiti umili a natalged latta ti presyo dagiti basic necessities ken prime commodities (BNPCs) iti entero nga Ilocos Region, uray pay no adda dagiti napaspasamak iti Middle East a mabalin nga makaapekto iti global a merkado.
Segun iti DTI Region 1, iti naudi a panangmonitor da kadagiti dadakkel a supermarket ken paglaklakoan iti rehiyon, nakitam a naurnos ken umdas ti suplay dagiti kangrunaan a produkto. Dagiti retailer ket agtultuloy met a sumurot iti Suggested Retail Prices (SRPs) tapno matalinaed a maawatan ken mabalin a gatangen dagiti konsumidor dagiti kangrunaan a pangkasapulan.
Kinuna ni DTI Region 1 Regional Director Merlie D. Membrere a tuloy-tuloy ti panangmonitor ti ahensiya iti presyo ken suplay dagiti produkto babaen iti naasideg a koordinasion kadagiti retailer ken lokal a gobyerno (LGUs) tapno mapagtalkan dagiti konsumidor ken maiwasan ti pannakariribok iti merkado.
“Inaaddaan kami iti tuloy-tuloy a panangmonitor iti presyo ken suplay, ken babaen iti naasideg a koordinasion kadagiti retailer ken LGUs, masigurado mi a maadda ken nalinteg ti presyo dagiti kangrunaan a produkto para kadagiti umili,” kinuna ni Membrere.
Pinalagip met ti DTI Region 1 kadagiti umili a saan a masapul ti panic buying gapu ta agtultuloy ken naurnos ti supply chain iti rehiyon ken kabaelan na a sungbatan ti kasapulan dagiti konsumidor.
Inyulit ti DTI Region 1 ti panagcommit na a salakniban ti kapakanan dagiti konsumidor babaen iti panangsigurado iti nalinteg a panagnegosyo ken pannakaadda dagiti kangrunaan a produkto. Maawisan dagiti konsumidor a mangipakaammo iti kaasidegan a opisina ti DTI no adda makitada a panaglabsing iti SRP wenno sabali pay a saan a umiso a panaglaklako.
Source: DTI Region 1
