Nagsagawa ng Joint Tactical Inspection at General Assembly ang Customer Relations Service (CRS) Department ng SM Baguio sa parking area ng nasabing mall nito lamang Sabado, Hunyo 11, 2022.
Ang aktibidad ay pinangunahan ni Police Colonel Glenn Lonogan, City Director, Baguio City Police Office bilang panauhing pandangal at tagapagsalita.
Dumalo rin sa aktibidad sina Ginoong Almus J. Alabe, Senior Assistant Vice President (SAVP) – CRS SM Supermalls, Ginoong Charleston M. Tan, SAVP- SM Retails, Ginoong Victor G. Santiago, AVP SM Food and Retail Group at Police Major Maria Alicia Valera, Highway Patrol Group – Benguet Provincial Team.
Ayon kay Ginoong Peter Julian Jr., CRS Manager-SM Baguio, ang JTI ay isinasagawa taun-taon sa mga security guard at maintenance crew ng naturang mall upang matiyak ang kanilang kahandaan sa loob at labas ng mall at upang matiyak ang kaligtasan ng tenants, customers at employees nito.
Bukod pa rito, binigyang parangal din ang mga security guard at maintenance worker na may mga natatanging paggawa.
