Opisyal nang ipinagkaloob ng Department of Agriculture – Bureau of Fisheries and Aquatic Resources (DA-BFAR) Regional Office 2 sa pamamagitan ni Provincial Fishery Officer Ritchie Rivera, ang isang 62-footer na fiberglass na komersyal na bangkang pangisda para sa Sumnanga Nakanmuan Fishermen’s Association noong Abril 11, 2025.
Ang bagong bangka, na may kabuuang bigat na 20 gross tonnage, ay kumpleto sa mga kagamitang pangisda na idinisenyo upang mapabuti ang kahusayan at kapasidad ng mga lokal na mangingisda.
Bahagi ito ng patuloy na inisyatibo ng BFAR na isulong ang napapanatiling pamamaraan ng pangingisda at paunlarin ang kabuhayan ng mga baybaying komunidad sa Sabtang at probinsya ng Batanes. Inaasahang ito ang magiging hudyat na maisulong ang deep sea fishing sa karagatan ng Batanes.
Ipinahayag ni G. Florentino H. Figuro, pangulo ng asosasyon, ang kanyang taos-pusong pasasalamat sa suporta ng pamahalaan at binigyang-diin ang positibong epekto ng nasabing bangka sa operasyon ng pangingisda at pangkalahatang kapakanan ng kanilang komunidad.
Patuloy na ipinatutupad ng BFAR ang mga programa at proyektong naglalayong bigyang-lakas ang mga mangingisda, isulong ang responsableng pangangasiwa sa yamang-dagat, at palakasin ang katatagan ng sektor ng pangisdaan sa buong bansa.
Source: BFAR Region 2
