Nakatanggap ng tulong ang kabuuang 3,724 pamilya mula sa mga barangay ng Bagay, Atulayan Norte, at Atulayan Sur sa Lungsod ng Tuguegarao mula kay dating PNP Chief Gen. Edgar Aglipay bilang bahagi ng kanyang “GIVING BACK” program nito lamang ika-3 ng Setyembre 2024.
Labis naman ang naging pasasalamat ni City Mayor Maila Rosario S. Ting-Que kay Ret. Gen. Aglipay para sa patuloy na pagtulong, lalo na sa mga panahon ng sakuna. Ayon sa alkalde, mahalaga ang tulong na ito hindi lamang bilang immediate relief, kundi bilang simbolo ng malasakit at pagkakaisa ng pribadong sektor at ng lokal na pamahalaan.
Pinasalamatan din ng mga punong barangay ang dating PNP Chief para sa biyayang ibinahagi sa kanilang mga nasasakupan. Sa panahon ng sakuna, tulad ng bagyo, ang mga ganitong tulong ay hindi matatawaran ang halaga, lalo na’t karamihan sa mga pamilya ay nakararanas ng hirap sa pagbangon mula sa mga pinsala. Ang kanilang pasasalamat ay simbolo ng kanilang pag-asa na magpapatuloy ang ganitong uri ng suporta sa hinaharap.
Sa patuloy na pagbibigay ng tulong, ipinapakita ni Ret. Gen. Aglipay at ng kanyang mga kumpanya ang kanilang taos-pusong malasakit sa kapwa. Ang “GIVING BACK” program ay hindi lamang programa ng pamamahagi ng tulong, kundi isang hakbang sa pagbuo ng mas matibay na komunidad na may pagkakaisa at handang bumangon sa anumang pagsubok.
Source: Tuguegarao City Information Office
