Matagumpay na nakapagtapos sa anim na araw na refresher training ang Emergency Response Company (ERC) ng 5th Infantry “Star” Division upang palakasin ang kanilang kakayahan sa humanitarian at disaster response (HADR) operations sa Camp Melchor F Dela Cruz, Upi, Gamu, Isabela noong Setyembre 7, 2024.
Ang pagsasanay ay nakatuon sa tatlong pangunahing aspeto: water search and rescue, mountain search and rescue, at collapse structure operations. Ang espesyal na pagsasanay na ito ay mahalaga upang matiyak na handa ang ERC na tumugon sa iba’t ibang uri ng emergency.
Ang dedikasyon ng ERC sa pagliligtas ng buhay at kabuhayan ay kaakibat ng mas malawak na misyon ng Armed Forces of the Philippines at ng lokal na pamahalaan.
Sa pamamagitan ng patuloy na pagsasanay at pagpapanatili ng mataas na antas ng kahandaan, ang 5ID ERC ay epektibong makakatugon sa mga sakuna at makapagbibigay ng kritikal na tulong sa mga apektadong komunidad.
Bukod sa pagsasanay ng 5ID ERC, nagsagawa rin ang Disaster Risk Reduction and Management Office (MDRRMO) ng Ilagan City, Isabela ng isang hiwalay na refresher training para sa 39 na indibidwal sa search and rescue operations. Ipinapakita ng kooperatibong hakbang na ito ang kahalagahan ng patuloy na pagsasanay at kahandaan sa pagtugon sa mga sakuna.
Source: 5th Infantry Star Division, Philippine Army
