Idinaos ang ika-28 Panagbenga Grand Parade and Ceremony na may temang “Pagdiriwang ng Tradisyon, Pagyakap sa Inobasyon” sa Baguio City nito lamang ika-3 ng Pebrero 2024.
Ang pagbubukas ng parada ay minarkahan ang pagsisimula ng Panagbenga Festival 2024. Nagsimula ang parada sa Panagbenga Park, sa kahabaan ng South Drive, Baguio City at nagtapos sa Melvin Jones Grandstand at Football Grounds.
Madaling araw pa lamang ay inilahad na ang dedikasyon at ang walang patid na suporta ng mga kapulisan sa pagtiyak ng seguridad at mapayapang pagdiriwang.
Ipinakita rin ng iba’t ibang sector ang kanilang suporta sa pamamagitan ng paglahok sa naturang grand parade. Kabilang na rito ang Philippine Military Academy, City Government of Baguio, Philippine National Police PRO COR, Liga ng mga Barangay mga Paaralan sa Baguio at Benguet, Cultural Dance Groups at iba pa.
Ang kaganapan ay dinaluhan din ng mga kagalang-galang na panauhin tulad ni Baguio City Congressman Hon. Mark O Go, City Mayor Hon. Benjamin B Magalong, at Regional Director ng National Police Commission-CAR, Ms. Editha S Puddoc, kasama ng iba pang pangunahing opisyal mula sa Baguio City.
Ang iba pang mga kaganapan na nakatakda sa panahon ng Panagbenga Festival ay kasama ang mga sumusunod:
•Spring Festival at Kite Flying Challenge sa Session Road at sa Burnham Park, ayon sa pagkakabanggit, sa Pebrero 10-11
•Philippine Military Academy (PMA) Alumni Homecoming sa Pebrero 15-17
•Fluvial Parade at Cultural Dance Competition sa Pebrero 8
•Grand Street Dance at Floral Float Parades sa Pebrero 24-25
•”Session Road in Bloom” kapag ang pangunahing kalsada ng Baguio ay nagiging isang eksklusibong pedestrian zone para sa mga pagdiriwang mula Pebrero 26 hanggang Marso 3
•Flower Tee Golf Classic sa Marso 1-2
•Pagtatapos ng pagdiriwang sa buong buwan na may fireworks display sa Marso 3
Ang Panagbenga Festival na tatagal hanggang ika-3 ng Marso ay naglalayong bigyang pansin ang tradisyon kultural ng lungsod at mga bagong pag-unlad. Layunin din nito na magbigay kagalakan, kulay, at diwa ng komunidad.
