Matagumpay na nagtapos ang 25 na mga Person Deprived of Liberty (PDL) ng BJMP Tuguegarao City District Jail – Male Dormitory ng Bread and Pastry Production NCII sa ginanap na closing at awarding program noong ika-7 ng Hulyo 2023.
Ito ay matapos sumailalim sa 18 na araw ang mga PDL na tinuruang linangin ang kanilang kakayahan sa pag-bake bilang bahagi ng livelihood program ng BJMP, katuwang ang Technology and Livelihood Development Office (TLDO) ng LGU Tuguegarao at sa pakikipagtulungan ng Technical Education and Skills Development Authority (TESDA) at Department of Science and Technology (DOST).
Ayon kay TLDO OIC Mario Eugenio, nasa humigit kumulang Php130,000 ang halaga ng mga kagamitan at mga kinailangan ang inilaang pondo na inaprubahan ni City Mayor Maila Rosario Ting-Que para sa bread and pastry sa naturang kulungan.
Bukod dito, may inilaang espasyo na magiging bakery o baking area sa loob mismo ng Tuguegarao City District Jail na ipinaayos at ginamit habang isinasagawa ang training.
Samantala, malugod namang pinasalamatan ni Jail Warden JSINSP Allan Jay P. Sunoco si Mayor Maila sa suporta nito, kung saan sa pamamagitan ng nasabing proyekto ay matutulungan ang mga PDL na magkaroon ng trabaho at kaalaman sa pangkabuhayan kahit nasa loob ang mga ito ng kulungan at magagamit din nila sa pagsisimula ng kanilang kabuhayan sakaling sila ay makalaya.
Tiniyak naman ni City Councilor Ronald Ortiz sa kanyang mensahe bilang kinatawan ni Mayor Maila na handa ang gobyerno na umalalay sa mga ito kung sila ay makalabas para magkaroon ng pagsisimulan.
Ang naturang programa ay dinaluhan din nina City Councilor Tirso Mangada, City Councilor Atty. Aldous Baccay, Elise Marie Lucas Melad-DOST Trainor, Edgardo Conde bilang kinatawan ni Acting PD Josephine Cabrera ng TESDA Cagayan at TESDA Trainor Mae Angeline Oro, na ginawaran ng Certificate of Appreciation mula sa LGU Tuguegarao.
Source: Tuguegarao City Information Office
