Ligtas at matagumpay na natagpuan ang dalawang dayuhan na unang naiulat na nawawala noong Setyembre 2 sa Sitio Lamagan, Brgy. Cambulo, Banaue, Ifugao nito lamang ika-3 ng Setyembre 2023.
Kinilala ng mga awtoridad ang dalawang dayuhan na sina Roy Schouten, 22, at Rich Schouten, 19, pawang mula sa Netherlands.
Batay sa ulat, nakatanggap ng impormasyon ang himpilan ng Banaue PNP hinggil sa dalawang dayuhan na nawawala matapos mag-trekking sa bulubunduking bahagi ng Brgy. Cambulo at Brgy. Pula, Banaue, Ifugao.
Agad naman nagsagawa ng Search and Rescue Operations ang Banaue PNP, Ifugao PNP kasama ang mga tauhan ng Bureau of Fire Protection-Banaue, Municipal Disaster Risk Reduction Management Office, at iba pang civilian volunteers na nagresulta sa pagkakaligtas ng dalawang Dutch Nationals.
Agad na binigyan ng paunang lunas ang dalawang dayuhan dahil sa minor injuries na kanilang natamo at ginabayan din pabalik sa town proper para sa karagdagang interbensyon.
