Narekober ng mga awtoridad at rescuers ang dalawang bangkay ng lalaki na napa-ulat na nalunod sa Lanas Lake, Mayag, Bauko, Mt. Province nito lamang umaga ng Disyembre 22, 2022.
Kinilala ang mga nalunod na sina Czar Jay V. Opag, 20 anyos, manggagawa at Mayzzon V Batatas, 24 anyos, may asawa at kapwa residente ng Kayan West, Tadian, Mt. Province.
Batay sa ulat, Disyembre 21, 2022, ay nagpunta ang dalawang biktima kasama ang ibang kaibigan sa Lanas Lake bandang 3:30 ng hapon. Sumakay ng bangka ang dalawang biktima upang mangisda ngunit tumaob ang bangka.
Ayon pa sa salaysay ng mga kasama ng mga biktima, sinubukan pa ni Mr. Opag na iligtas si Mr. Batatas subalit sila ay kapwa nalunod.
Mabilis naman tumugon ang mga tauhan ng Bauko PNP, BFP, MDRMO, Tourism Office-Bauko at ilang mga residente matapos matanggap ang tawag at sinikap na i-rescue at hanapin ang dalawang biktima.
Ngunit sa kasamang palad ay natagpuan ang dalawang lalaki na wala nang buhay.
